Níl rud ar bith sa chiseán.
Seoladh an leabhar “Mamaí Gé” ag Oireachtas na Gaeilge
Rinne an t-údar aitheanta Áine Ní Ghlinn an leabhar úr Mamaí Gé le Gabriel Rosenstock, atá maisithe ag Kim Sharkey, a sheoladh ag Oireachtas an Gaeilge i gCill Airne Dé Sathairn.
Is órchiste de rannta Mhamaí Gé do pháistí óga atá sa leabhar seo. Rannta iad atá bailithe le chéile go speisialta ag Gabriel agus traschruthaithe i nGaeilge go cúramach aige, agus tá an leabhar saibhrithe go mór ag léaráidí Kim. Ag trácht ar an rann “Bean an tSléibhe”, mar shampla de na rannta atá sa leabhar, dúirt Áine go bhfuil an rann leis féin speisialta ar fad “ach go n-ardaíonn an pictiúr agus an ealaíon ó ghnáth-rann é go seoid ealaíne, agus tá sin fíor faoi gach rann sa leabhar.”
Ag taispeáint an leabhar di don lucht féachana a bhí i láthair i Svuít 1 san INEC, dúirt Áine gur “órchiste véarsaíochta agus órchiste ealaíona” atá sa leabhar seo. “Seo ceann des na leabhair is áille le láimhseáil dá bhfaca mé riamh,” ar sí.
Chun blaiseadh a thabhairt don lucht féachana de na rannta sa leabhar, rinne Aoibh Ní Dhálaigh agus Ellie Ní Mhainín roinnt de na ranna a aithris os ard agus bhí an rithim agus an chleasaíocht focal le háireamh san insint bhinn bhlasta a rinne siad ar na dánta.
Ghabh Áine comhghairdeas le Gabriel agus Kim agus mhol sí do gach duine cóip den leabhar seo a cheannach mar bhronntanas Nollag “ní amháin do pháistí ach do dhuine ar bith a bhí ina pháiste riamh, agus a bhfuil cuimhne acu ar na ramáis seo.”
Ní raibh an t-údar Gabriel Rosenstock in ann a bheith i láthair ag an seoladh ach chur sé a bheannacht i bhfoirm rann a chum sé don ócáid, ar sé:
A Mhamaí Gé! A Mhamaí Gé!
Fág ubh i gCill Airne
i do dhéidh!
Tá Mamaí Gé ar fáil sna siopaí anois agus ó shuíomh idirlín eabhloid.com
