Óid do Chaora Dhubh Jilebute

Tá Jidi Majia ar dhuine d’fhilí móra na mionlach dúchasach sa tSín agus tá cáil air ar fud an domhain as a chuid filíochta. Baineann Jidi Majia le treibh dhúchasach an Yi agus ina chuid filíochta go minic scrúdaíonn sé an oidhreacht shaibhir sin as a dtagann sé, ag úsáid na scéalta, an mhiotais, na teanga agus an chultúir le tábhacht na n-ealaíon agus na cruthaitheachta a chur trasna. Feictear téamaí an nádúir, truailliú na timpeallachta agus caidreamh idirnáisiúnta ina shaothar agus ceisteanna móra an domhain a phlé aige. Tá go leor duaiseanna móra buaite ag Jidi Majia sa tSín agus thar lear ó bhuaigh sé príomhdhuais fhilíochta a thíre i 1986 – Duais Náisiúnta Filíochta na Síne – leis an chnuasach Amhrán mo Chéad Ghrá (Song of My First Love). Tá a shaothar aistrithe go níos mó ná 20 teanga ar fud an domhain. Scríbhneoir mothálach neamheaglach é a dhéanann comóradh ar a dhaoine agus is file é a léiríonn meas don timpeallacht agus don domhan íogair ina mairimid.
Is traschruthú é i nGaeilge an leabhar seo ar bhailiúchán de dhánta le Jidi Majia a thagann chugainn tríd na haistriúcháin Bhéarla a rinne an t-aistritheoir Jami Proctor Xu ar a chuid filíochta agus tugann siad léiriú iontach dúinn ar an ard-ealaín a bhaineann le cuid filíochta Jidi Majia.