Dordéan

Sa bhailiúchán dánta seo, tugann Róise Ní Bhaoill ar turas muid timpeall na cruinne, turas a thugann léargas dúinn ar áilleacht, ar fhulaingt agus ar leochaileacht an tsaoil. Is filíocht í seo atá fréamhaithe i bhfírinne na beatha agus i ndínit an duine. Mothaítear an bhá ghaoil agus an fhiosracht pholaitiúil atá inti ó dhúchas, nó ní ligeann Ní Bhaoill chun dearmaid na scéalta a chuaigh i gcion uirthi agus í i mbun a cuid taistil. Ní scarann sí an ní pearsanta ón ní pholaitiúil, nó éiríonn léi a taithí saoil in Éirinn a fhí leis na hiontais agus leis an chruatan a fheiceann sí i dtíortha eile, amhail is gur scáthán anama an chine dhaonna atá fite sna véarsaí aici. Sna dánta seo, cruthaítear aisling de shaol comhaimseartha atá sobhriste agus álainn araon.